Travellers and Magicians - భూటాన్

భారత్,చైనాలు రెండు పెద్ద దేశాలు. వాటి మధ్య ఉందో చిన్న దేశం భూటాన్.

Khyentse Norbu భూటాన్ కి చెందిన బౌద్ధ లామా. తన ప్రజల జీవితాన్ని, సంస్కృతిని ప్రపంచానికి తెలియచేయాలనుకున్నాడు.

Travellers and Magicians అనే చక్కని సినిమా తీసాడు. పూర్తివివరాలకు ఈక్రింది లింక్ క్లిక్ చేయండి.
http://navatarangam.com/?p=156

Postmen in the Mountains - చైనా

కధ

ఇది ఓ తండ్రీ కొడుకుల కధ.

తండ్రి పోస్ట్ మేన్. చైనాలో,హునాన్ అనబడే మారుమూల పర్వత ప్రాంతాల్లో, కాలినడకన ఉత్తారాలు బట్వాడా చేస్తుంటాడు. పెంపుడు కుక్క లాయోర్ తోడుగా ఉంటుంది. తండ్రి ఆరోగ్యం క్షీణించంటంతో ఆ ఉద్యోగం కొడుక్కి వస్తుంది.

ఉదయాన్నే కొడుకు కొత్త ఉద్యోగానికి రెడీ అవుతుంటాడు. తండ్రి విశ్రాంతి తీసుకోకుండా అతనికి ఒకటే జాగ్రత్తలు చెపుతుంటాడు. కొండలు గుట్టలు ఎక్కి ఆ చిన్న చిన్న గ్రామాల్లో ఉత్తరాలు పంచటం చిన్న విషయం కాదు. తిరిగిరావటానికి 3 రోజులు పడుతుంది. కొడుకుకి ప్రయాణంలో తోడుగా ఉండి దారిచూపుతుంది కదా అనుకుంటే, లాయోర్ వెళ్ళనని మొరాయిస్తుంది. కొడుకుకి దారి చూపటానికి తండ్రి కూడా బయలుదేరతాడు. వాళ్ళతో పాటు లాయోర్ కూడా బయలుదేరుతుంది.

పోస్ట్ మేన్ గా కొడుకిది మొదటి యాత్ర. తండ్రికిది ఆఖరిది.

పని వత్తిడిలో తండ్రి, కుటుంబంతో గడిపింది చాలా తక్కువ. బహుశా అందుకేనేమో తండ్రంటే కొడుక్కి ఏదో అర్ధంగాని భయం,బెరుకుతనం.

"నాన్న సాధించింది ఏముంది? జీవితమంతా ఈకొండలు,గుట్టలు తిరుగుతూ ఉత్తరాలు పంచటమే కదా!"

కాని కొడుకు ఈప్రయాణంలో ఓ కొత్త వ్యక్తిని చూస్తాడు.

"గిరిజనుల బాగోగులు తెలుసుకుంటూ,వారిని ఉత్సాహపరుస్తూ,సహాయపడుతున్న ఎవరీ కొత్త వ్యక్తి? ఇతనే కదూ నాన్న! ఎందుకు అతనిని చూడగానే వారిలో అంత ఆనందం? వారికి ఇంత ఆత్మీయుడు ఎలా అయ్యాడు?"

తండ్రంటే భయం బదులుగా ఆరాధన,ప్రేమ మొదలవుతాయి.

ప్రయాణంలోని ప్రతి మజిలి,ప్రతి అనుభవం ద్వారా,అతనికి తండ్రి గురించి కొత్త విషయాలు తెలుస్తాయి.

నలుగురికి ఉపయోగపడేలా జీవించటమే జీవితపరమార్ధమని,తండ్రి జీవితాన్ని తెలుసుకోవడం ద్వారా గ్రహిస్తాడు. కేవలం వృత్తిపరమైన భాధ్యతలే కాకుండా, తండ్రి నమ్మకాలను, విలువలను కూడా కొడుకు తెలుసుకుంటాడు.


* * *

ప్రేక్షకులకు ఏదో ఒక సన్నివేశంలో తమ తండ్రులు గుర్తుకొస్తారు. సుందరమైన ప్రకృతి మన మనస్సులను హత్తుకుంటుంది. తండ్రీ,కొడుకుల నటన అందర్ని మెప్పిస్తుంది.

తండ్రి పాత్రధారి TENG RUJUN, బీజీంగ్ సెంట్రల్ డ్రామా అకాడెమీలో ప్రొఫెసర్. ఈసినిమాలోని నటనకి చైనా బెస్ట్ యాక్టర్ అవార్డ్ తో అతనిని గౌరవించారు.
Liu Ye కొడుకుగా నటించాడు. ఈసినిమా తీసేసమయంలో సెంట్రల్ డ్రామా అకాడెమీ విధ్యార్ధి.


* * *

వరల్డ్ సినిమా గురించి తెలుసుకునే ప్రయత్నంలో ఉన్నారా?

రొటీన్ చెత్త సినిమాలతో విసిగి, వరల్డ్ సినిమా గురించి తెలుసుకునే ప్రయత్నంలో ఉన్నారా?

మీకు అభినంధనలు.

విదేశీ చిత్రాలలో కూడా చాలా చెత్తవి ఉంటాయని, ఏదేశంలో అయినా చెత్త ఎక్కువని త్వరగానే గ్రహిస్తారు. చెత్త సినిమాలు చూసి చూసి,ఆ రుచికి అలవాటైన ప్రాణం ఏదేశపు చిత్రమైన ఆ చెత్త కోసమే వెదుకుతుంది.

కొంచెం ఓపిక చేసుకుని వెదికితే మంచి చిత్రాలు భారతదేశంలోనూ కనిపిస్తాయి. విదేశాల్లోనూ కనిపిస్తాయి.

వరల్డ్ సినిమాలలో నేను చూసిన వాటిల్లో నాకు మంచివి అనిపించినవి మీకు పరిచయం చేసే ముందు, మీతో కొన్ని ఆలోచనలు పంచుకోవాలనుకుంటున్నాను.

ఈ సినిమాలు ఎవరికోసం కాదు?

కాలక్షేపమే జీవిత పరమార్ధంగా భావిస్తూ, ఎలాంటి చాయిస్ లేనట్టుగా, విధిగా ఏదో ఒక సినిమా చూడడం ఒక వ్యసనం. సినిమా అనేది కేవలం టైంపాస్ కోసమేనని ఇప్పటికే మీరు నమ్ముతూ ఉంటే,ఈ సినిమాలు మిమ్మల్ని నిరాశపర్చవచ్చు.

ఈ సినిమాలు ఎవరికోసం?

సినిమా అనేది గొప్ప కళని,మన ఆలోచనలను,అభివృద్ధిని ప్రభావితం చేస్తుందని నమ్ముతూ, మంచి సినిమాల గురించి తెలుసుకోవడం,మంచి సినిమాలు చూడడం అనేది ఒక ఆరోగ్యకరమైన ఎదుగుదలగా భావించేవారికోసం.

ఇంతకీ మంచి సినిమా అంటే ఏమిటి?

మంచి సినిమాకి చాలా నిర్వచనాలు ఉన్నాయి. నా దృస్టిలో మంచి సినిమా అంటే:

1. ఆలోచింపచేసేది
2. అనుభూతిని కలిగించేది
3. జీవితం పట్ల సమాజం పట్ల అవగాహన కలిగించేది, ప్రేమని పెంచేది
4. మనలో మానవత్వాన్ని పరిమళింపచేసేది.